Aymaranakax nayraxa, jupanak pachpaw isx qapusin, sawusin, ch’ukusipxiritayna. Warmik warmix telarata: awayu, wak’a, phullu, tari, chusi, ukanak sawuritayna. Chachasti, wayit sawurakiritayna, wayitatxa: allmilla, urkhu, manqhanchha, ukanak ch’ukuritayna.

Jichha tiempux mayämaxiwa, janiw añch sawxapxiti. Potos tuqina, Orur tuqin jach’a, jisk’a, k’acha saltanakan jichhakamas sawusipki.

Sawuñatakixa: allpach t’arwa, qarwa t’arwa, iwija t’arwa, wari t’arwa, ukanakaw qapuña. Qapusinx k’anthiña, k’antisinsti tiñiña, tiñisinsti tiljaña, tiljasinsti qalltat tukuñkam sawuña.

Chachas warmis k’anañx yatirakiwa. Chachanakaxa: q’urawa, wiska, chaku, ukanak k’ani. Warminakasti: t’isnu, tullma, ukanak k’anaraki.